Nasubuan ang Malacañang sa natabo sa Davao City kun sa diin may pila ka mga estudyante nga gin-alegar nga nagsinggit sang malain nga mga tinaga batok kay Presidente Ferdinand Marcos Jr. kadungan sa iya pagbisita sa lugar.
Nakuhaan sang video ang amo nga insidente kag madasig nga naglapta sa social media.
Suno kay Palace Press Officer Claire Castro, indi makatuon sang husto nga pamatasan ang mga kabataan kun ang ila ginatan-aw nga mga lider ukon mga tawo sa ila palibot mismo ang nagapakita sang kakulang sa pagrespeto kag paggamit sang malain nga mga pulong.
“Hindi matututo ng tamang pag-uugali ang mga kabataan kung ang nakikita nilang iniidolo nila na lider o ang mga nasa paligid nila ay wala rin modo, palamura at nagdarasal sa kapahamakan ng iba. Nakakalungkot lamang na nangyari ito sa eskwelahan pa na nagpapakita kung ano na nga ba ang natutunan nila sa mga paaralan, sa bahay at sa paligid nila,” suno kay Castro.
Nagpanawagan man siya nga ibalik ang disente kag matarong nga pamatasan sa pungsod kag siguruhon nga indi mapabay-an ang husto nga paggiya sa mga kabataan.
“Let us bring back decency to our country. We should not allow our children to be neglected,” suno kay Castro.
Nauna na nga nagpangayo sang pasaylo ang Department of Education ukon DepEd Schools Division of Davao bangud sang indi angay nga ginpakita nga pamatasan sang pila ka mga estudyante.
Suno sa DepEd, apat ka estudyante ang nalakip sa insidente kag napaidalom na subong sa nagakaigo nga disciplinary measures.
“We deeply regret the incident and assure the public that such conduct is not tolerated and does not reflect the values of respect, discipline, and responsibility that our schools uphold,” suno sa official statement sang DepEd Davao City.
“We will continue to work closely with parents and the community to reinforce positive behavior and uphold the highest standards of student conduct,” dugang sini.#
