Ginpasalig sang Malacañang Palace nga yara sa maayo nga kondisyon ang ikaayong lawas ni President Ferdinand Marcos Jr.
Ini ang sabat ni Palace Press Officer Usec Claire Castro sa tunga sang mga espekulasyon angot sa kondisyon sang ikaayong lawas sang Presidente nga nagtuhaw sa social media.
Suno kay Castro nga pamatuod sang maayo nga panglawas sang Presidente amo ang iya adlaw-adlaw nga pagtambong sa nagkalain-lain nga aktibidad sa guwa sang Palasyo kag mga pagsinapol sa Malacañang, nga suno sa iya indi matuman sang Presidente kon indi siya mabakod, mapagsik, kag physically fit.
Mensahe ni Castro sa mga fake news peddlers nga untatan na ang paghimu-himo sang istorya tuhoy sa Presidente bangud indi ini maayo para sa pungsod.
Mas makapaayo suno sa iya nga ipangamuyo lang sang mga Pilipino ang maayo nga panglawason sang Presidente agud nga padayon sini ang epektibo nga pagpamuno sa pungsod kag indi kaangay sang mga nagapakuno-kuno nga doktor sa social media.
