Preparado ang gobyerno sa ano man nga eventuality sa tunga sang mga report sa pag-issue sang arrest warrant sang International Criminal Court (ICC) batok kay Former President Rodrigo Duterte.
Suno kay Palace Spokesperson Undersecretary Claire Castro, wala pa sang kumpirmasyon gikan sa Malacañang angut sa pag-issue sang warrant of arrest sang International Tribunal.
Apang, ang chief sang Presidential Communications Office nga si Jay Ruiz nagsiling man nga ang gobyerno nakahanda sa ano man nga hitabo.
Suno sa Office of the Vice President (OVP), si Vice President Sara Duterte ang nag-upod sa iya amay nga sa Hong Kong para sa isa ka sortie sang Partido Demokratiko Pilipino-Lakas ng Bayan (PDP-Laban).
Ang Bise Presidente ang natalana nga magtambong sa kahiwatan sang iya amay upod sa mga overseas Filipino workers sa Wan Chai, Hong Kong.
Nakita naman ang anay presidente sa Causeway Bay sang Marso 8, sa tunga sang nagalapta nga mga huring-huring nga ang International Criminal Court (ICC) nagpaguwa sang warrant of arrest batuk sa iya.
Nahibaluan nga sang Agosto sang nagligad nga tuig, ginpahayag ni Supreme Court Associate Justice Antonio Carpio nga mahimo nga magpaguwa sang warrant of arrest batuk sa anay presidente.
Gina-imbestigaran sang International Criminal Court ukon ICC si Duterte sa gina-alegar crimes against humanity bangud sa pagkapatay sang linibo ka tawo sa tion sang war on drugs nga ginpatuman sa iya pagpungko.
Ginabulubanta sang datos sang gobyerno nga 6,000 ka tawo ang napatay sa tion sang war on drugs. Apang, ang local and international human rights groups nagpahayag sang kadamuon sang napatay sa tubtob 30,000.
