Kumpyansa ang Malacañang nga indi maapektuhan ang relasyon sang Pilipinas kag Estados Unidos sang Amerika apisar nga ginpasugtan sang Iran ang mga barko padulong diri sa pungsod nga makalabay sa Strait of Hormuz.
Ang Estados Unidos amo ang ginakabig pinakamalawig nga kaalyado sang Pilipinas kun depensa ang pagahambalan.
Magkaaway naman subong ang Estados Unidos kag ang Iran.
Sang damlag lang, nakakuha sang pasalig ang Department of Foreign Affairs (DFA) halin sa Iran nga paagyon sini sa Strait of Hormuz ang mga barko nga pakadto sa Pilipinas amo man ang mga Filipino seafarers.
Kasunod sang amo nga commitment, ginlaragway sang Malacañang ang relasyon sang Pilipinas kag Iran nga “vibrant.”
Suno kay Palace Press Officer Undersecretary Claire Castro, wala man sang isyu diri bangud nahangpan man sang US kun ano ang ginapangatubang subong nga sitwasyon.
Kasunod sang gyera sang US kag Israel batok sa Iran, isa ang Pilipinas sa pinakaapektado kag labing-una sa kalibutan nga nagdeklarar sang state of energy emergency bangud sa krisis sa gatong. Net importer sang langis ang Pilipinas.
“Wala po tayong nakikitang issue sa ating kaibigang bansa na US dahil alam naman nila ang sitwasyon ngayon,” suno kay Castro.
Ginpaanggid sini ang sitwasyon sa padayon nga pag-import sang langis halin sa Russia — pungsod nga kaaway man sang US. Bisan ang US suno kay Castro ang nagpahagan-hagan man sang sanctions sa langis halin sa Russia bangud sang problema subong sa global supply.
Matandaan nga suno sa DFA, si Iranian Foreign Minister Abbas Araghchi ang naghatag sang garantiya nga safe nga makalabay ang Philippine vessels sa Strait of Hormuz.
“Ayon sa Department of Foreign Affairs… tiniyak ni Iranian Foreign Minister Abbas Araghchi ang ligtas at mapayapang pagdaan ng Philippine-flagged vessels,” suno kay Castro.
“Matitiyak din nito ang tuloy-tuloy na delivery ng fertilizer at langis sa bansa,” dugang sini.
Apisar sini, indi pa matumod sang Malacañang kun paano mabuligan sini nga arrangement nga mapanubo ang domestic prices. Ini bangud nagpanglakaak sa masobra P100 kada litro ang presyo sang langis sa masobra na isa ka bulan.
“Hindi pinag-uusapan dito ang halaga,” suno kay Castro. “Ang pinag-uusapan dito ay ‘yung patuloy na supply ng petrolyo sa ating bansa.”#
