Tun-an sang Malacañang ang report nga naka-donar pa sang mga motorsiklo sa Philippine National Police (PNP) kag sa Local Government Unit (LGU) ang pila sa ginaalegar mga espiya sang China nga nadakpan sang otoridad.
Suno kay Presidential Communications Office (PCO) Undersecretary Claire Castro, imbestigaran kun may lain pa gid nga motibo sa amo nga donasyon, bangud sa pagkamatuod suno sa iya, wala man sang malain nga magbaton sang donasyon kun ginhatag ini sa maayo nga tinutuyo.
Base sa nauna nagguwa nga report, sanday Wang Yongyi, Wu Junren, Cai Shaohuang, kag Chen Haitao ang naghatag sang donasyon sa Tarlac City kag sa pulis paagi sa grupo nga suportado sang China sadtong 2022.
Ginsiling sa report nga sanday Wang, Wu, kag Cai ang nakahatag sang 10 Chinese-made motorcycles nga nagabalor sang $2,500 ukon P144,800 kada isa sa Manila police.
Ginkumpirma man sang Manila Local Government Unit nga nabaton gid man sang pulis sa ila hurisdiksyon ang amo nga mga motorsiklo, apang ginklaro nga wala sang inter-aksyon si Manila Mayor Honey Lacuna sa donor magluwas lamang sa adlaw nga ginpatigayon ang turnover ceremony.
Una naman nga ginsiling ni PNP-Crime Investigation and Detection Group chief Brig. Gen. Nicolas Torre III nga nagmandu na ang chief sang Philippine National Police nga imbestigaran ini nga report.
