Ginpanindugan sang Malacañang nga wala sang basehan ang mga ginahaboy nga alegasyon batok kay President Ferdinand Marcos Jr.
Suno kay Presidential Communications Office (PCO) Acting Secretary Dave Gomez, wala sang kamatuoran ang mga akusasyon.
Ginpunto man ni Gomez nga mismo si Marcos ang nagbulgar sang mga anomaliya sa mga proyekto sa flood control.
Nagapatigayon man ini sang mga tikang agud mapasiguro nga ang mga kawatan mapasabat, kag ang mga ginkawat nga mga manggad mabawi.
Nauna na nga gin-akusaran sang anay Ako Bicol party-list representative nga si Zaldy Co ang Presidente, ang pakaisa sini nga si anay House Speaker Martin Romualdez, kag pila ka mga myembro sang gabinete nga ginapahayag nga yara sa likod sang P100 billion nga insertion sa national budget.
Suno kay Co, ang P100 billion nga insertion sa 2025 budget sang Department of Public Works and Highways (DPWH) ang ginbuhinan sang P50 billion agud indi magdako ang budget sini kumparar sa Department of Education (DepEd).
Ginsiling man ni Co nga “full force” ang gobyerno agud pahipuson siya.
Ginhangkat man ni Gomez si Co nga magpauli sa Pilipinas kag iplastar ang iya mga pahayag sa idalom sang pagpanumpa.
