ILOILO CITY – Magapatigayon sang pagsinapol ang Iloilo Business Club kaangot sa epekto sa negosyo sa syudad sang pagtaas sang kaso sang Coronavirus Disease 2019 (COVID-19) sa diin lima na ang patay.
Ang nasambit nga pagsinapol ang kasunod sang ginbuy-an nga pahayag ni Presidente Rodrigo Duterte sa mga himuon nga tikang agud malikawan ang balatian nga sa subong ginbatak na sa Code Red Sublevel 2.
Sa interview sang Bombo Radyo kay Lea Lara, executive director sang Iloilo Business Club, iya ginpahayag nga nagahanda na ang mga negosyante sa posible epekto sa ila kita bangud sa nasambit nga balatian.
Nahibaluan nga ginpahayag sang presidente nga ang mga manufacturing, retail kag service establishments ang magapadayon sang ila operasyon apang, nagakadapat nga ipatuman ang strikto nga social distancing measures.
Suno kay Lara, lakip sa ila agenda amo ang status update sa negosyo kag ang epekto sang pagsuspinde sang domestic, land kag sea travel halin kag padulong sa Metro Manila umpisa Marso 15 tubtub Abril 14.
Samtang, ginpasigurado naman ni Lara nga kalabanan na sa mga establisyemento ang nagabutang na sang mga alcohol kag sanitizers sa ila entrance bilang kabahin sang hygene.
Nagpangayo man sang paghangop si Lara sa mga pumuluyo kag customers nga nagapila sang malawig agud lang makasulod sa mga establisyemento bangud gamay lang ang mga thermal scanners sang mga ini.
