Gin-agyan sang convoy ni President Ferdinand Marcos, Jr. ang Aganan Flyover sa Pavia, Iloilo agud i-check ang kontrobersyal nga proyekto nga gin-umpisahan sang 2019 apang tubtub subong wala pa gihapon matapos.
Kadungan ini sang iya pagbisita sa syudad kahapon, Agusto 13, agud pangunahan ang inagurasyon sa rehabilitated Iloilo Fish Port complex.
Gin-cite sang Presidential Communications Office (PCO) ang report nga sala ang original nga disenyo kag pag-check sa kadalumon sang pundasyon sang flyover gani nga kinahanglan naman nga kay-uhon sang Department of Public Works and Highways (DPWH) gamit ang jet grouting.
“Dumaan ang convoy ni Pangulong Ferdinand R. Marcos Jr. sa Aganan Flyover sa Pavia, Iloilo upang personal na suriin ang proyektong sinimulan noong 2019 ngunit hanggang ngayon ay hindi pa tapos. Ayon sa mga ulat, mali ang orihinal na disenyo at pagsusuri sa lalim ng pundasyon kaya’t kailangang ayusin gamit ang jet grouting,” suno sa PCO.
Dugang sang opisina, ang budget para diri ang kuhaon naman sa pondo nga para kuntani sa pagtapos sa flyover, apang kulang gihapon para dalayon nga matapos na ang project.
Ginpangalanan man sang opisina ang kontraktor ngaInternational Builders Corporation nga amo man ang kontraktor sa Ungka Flyover sa Iloilo City nga kontrobersyal man bangud sa structural issues.
“Ang pondo para rito ay kukunin mula sa budget na nakalaan sana para sa pagtatapos ng flyover, at kulang pa rin upang tuluyang matapos ang proyekto. Ang contractor ng naturang proyekto ay IBC International Builders Corporation, na siya ring gumawa ng pansamantalang isinara na Ungka Flyover sa Iloilo City dahil sa structural issues. Sa ngayon, nananatiling malaking perwisyo sa trapiko ang matagal nang pagkaantala ng konstruksyon,” suno pa sa opisina.
Nahibaluan nga nagabalor ang Aganan Flyover sang P802-million kag ginpauntat ang construction sang Disyembre 2022 bangud sa safety kag structural concerns kasunod sang inconsistent soil test results nga rason sang pagguwa sang mga pagpangduha-duha sa pundasyon sang proyekto. May yara na sang third-party consultant nga nagapatigayon sang detalyado nga geotechnical study sa amo nga kontrobersyal nga flyover.#
