ILOILO CITY – Magapangatubang sang penalidad ang mga pabrika kag business establishments nga nagahaboy sang basura sa mga suba sa Iloilo City.
Ini matapos nga nagareklamo ang mga residente sang Barangay Magsaysay Village La Paz Iloilo City sa malang-og nga baho halin sa suba.
Sa interview sang Bombo Radyo kay Atty. Arjun Marven Calvo, Environmental Management Specialist I sang Department of Environment and Natural Resources Office Region 6, iya ginpahayag nga may yara sang duha ka klase sang kaso nga mahimo atubangon ang mga indibidwal nga madakpan sa akto kaangay sang paglapas sa Clean Water Act of 2004 kag Environmental Compliance Certificate.
Suno kay Calvo, hugot nga ginadumilian ang paghaboy sang basura nga masami nagaresulta sang pollution sa mga waterways.
Mahimo naman nga i-report sa mga otoridad ang mga tawo sa likod sang paghaboy sang basura ukon waste products sa suba agud maimbestigaran kag mahatagan sang nagakaigo nga penalidad.
Samtang, nagakahangawa ang mga residente sang Barangay Magsaysay Village La Paz, Iloilo City bangud sa indi maagwantahan nga baho sa suba.
Sa interview sang Bombo Radyo kay Rosalie Armaña, barangay kagawad sang nasambit nga barangay, iya ginpahayag nga nagadugang ang baho sa suba kun tuman ka init kag nagabubu ang ulan.
Suno kay Armaña, apisar may yara sag septic tank ang tagsa ka mga panimalay, indi ini makasarang sa pagkuha sang baho.
Sa matuod suno sa natungdan, ang mga pumuluyo pa ang nagabuligay agud matinluan ang suba.
