ILOILO – Malapit 1,000 nga mga mamumugon ang nadulaan sang trabaho sa Western Visayas bangud sa Coronavirus Disease 2019 (COVID-19) pandemic.
Sa interview sang Bombo Radyo kay Niezel Sabrido, tagpamaba sang Department of Labor and Employment Region 6, iya ginpahayag nga 30 ka mga establisimento ang nagsirado sa diin naapektuhan ang 282 ka mga mamumugon samtang 97 ka mga etablisimento naman ang nag pang lay-off ukon nagpangbuhin sang mga empleyado sa diin 649 ang nadulaan sang trabaho.
Suno kay Sabrido, ang mga mamumugon nga nadulaan sang trabaho ang gikan sa Iloilo kag Negros Occidental.
Pahayag niya, tuman nga naapektuhan ang industriya sang turismo kaangay sang hotel, resorts kag travel agencies.
Dugang pa sang natungdan, may yara sang programa ang gobyerno para sa mga nadulaan sang trabaho isa na dira ang Tulong Panghanapbuhay sa Ating Disadvantaged/Displaced ukon TUPAD sang Department of Labor and Employment kag unemployment benefits sa Social Security System.
