Kabug-usan nga 196 ka mga delegado sang Iloilo City ang ginpadala sa 2024 Batang Pinoy national championships sa Puerto Princesa City, Palawan.
Ang hinampang ang nag-umpisa sang Nobyembre 23 kag magalawig tubtob sa Nobyembre 28.
Sa interview sang Bombo Radyo kay Rudiver Jungco Sr., Executive Assistant for Youth and Sports, iya ginpahayag nga manubo subong nga tuig ang numero sang mga delegado nga ila ginpadala sa kahiwatan.
Ini bangud man sa ginpatuman nga adjustments sa age requirement sa diin ang mga kabataan lang nga naga-edad sang 12 tubtob 17 anyos ang makahampang.
Sa pihak sini, positibo sa gihapon si Jungco nga makadala pauli sang madamo nga mga medalya ang mga Ilonggo nga atleta.
Nagpain naman ang Iloilo City Government sang P2.1 million para sa galastuhan sang mga delegado.
Matandaan nga sang 2023, yara sa 6th place ang syudad sa Batang Pinoy.
