Nagapabilin nga bukas ang 21 ka evacuation centers sa syudad sang Iloilo para sa mga residente nga indi pa gihapon makapauli sa ila tagsa ka balay bangud sang epekto sang malain nga tyempo dala sang enhanced southwest monsoon.
Sa latest report sang Iloilo City Emergency Operations Center, nakasaad nga malapit 200 pa ka mga pamilya ang wala pa nakapauli nga katumbas sang masobra 600 ka mga indibidwal.
Sa 90 ka mga barangay nga gin-report nga nagbaha halin sang naglinigad nga inadlaw, 18 subong ang wala pa gihapon naka-subside.
Sa data sang opisina, 47 naman ka mga balay sa syudad ang nahalitan kun sa diin walo ang naubos gid guba samtang 39 naman ang may partial nga halit.
Sa interview sang Bombo Radyo kay Mr. Darwin Papa, ang chief sang Disaster Response Division sang City Disaster Risk Reduction and Management Office, ginpahayag sini nga may bastante nga food packs ang syudad kag nagapadayon man ang community kitchen para sa mga evacuees.
Nahibaluan nga halin sang naglaslas sanday Bagyo Dante kag Emong kag ginpabaskog ang habagat, masobra 47,000 ka mga residente ang apektado diri sa Iloilo City.
Bisan nga nakaguwa na sa Philippine Area of Responsibility ang sunod-sunod nga mga bagyo, ginapa-aligmat sa gihapon ang mga residente sa syudad ilabi na ang mga malapit sa baybayon.
Ginpahanumdom sang opisina nga habagat season subong gani nga kun may magporma nga bagyo ukon weather disturbance bisan malayo pa sa Pilipinas, gilayon nga nagabaskog ang southwest monsoon nga amo ang dapat preparahan sang mga pumuluyo.#
