Nagdangat na sa 194 ka mga tawo ang kumpirmado nga napatay sa Pakistan sa sulod lang sang isa ka adlaw bangud sang mabaskog nga pag-ulan nga nagtuga sang lapnagon nga baha kag pagkatiphag sang duta.
Suno sa National Disaster Management Authority, 180 sa mga nadulaan sang kabuhi ang naghalin sa Khyber Pakhtunkhwa province sa northwestern nga bahin sang pungsod.
Magluwas diri, may isa ka military helicopter nga pakadto kuntani sa rescue mission sa nabahaan nga probinsya, apang bangud sa malain nga tyempo, nagtibusok ini kag napatay ang lima ka crew members.
Nahibaluan nga nagpaguwa ang Meteorological Department sang heavy rain alert para sa northwest kun sa diin gin-abisuhan ang mga tawo nga likawan ang pagkadto sa vulnerable areas.
Sandig sa government forecasters, mahimo maglawig ang mabaskog nga pag-ulan tubtub sa Agusto 21 sa northwest Pakistan kun sa diin pila ka areas na ang nadeklarar na nga disaster zones.
