Patay ang 180 ka mga tawo sa Cite Soleil area sa Haiti bangud sa massacre nga ginaalegar nga ginmandu sang lider sang isa ka gang.
Kalabanan sa mga biktima amo ang mga tigulang suno sa data sang National Human Rights Defense Network.
Suno sa opisina sang Prime Minister, ginhulag na nila ang tanan nga pwersa sang gobyerno para mapangita ang responsable sa krimen lakip na mismo ang Wharf Jeremie gang leader nga si Monel “Mikano” Felix.
Ginalantaw nga magdamo pa ang casualties bangud sa reports nga may mga lawas pa nga ginpangsunog sa mga dalan lakip na ang mga mas bataon nga residente nga nagtuyo kuntani nga magluwas sa ila mga kaupdanan.
Base sa nagaguwa nga imbestigasyon, ginmandu sang gang leader ang massacre bangud nagmasakit ang iya anak kag ginbawian gid sang kabuhi. Ginapatihan sini nga ang balatian sang bata ang resulta sang pagpanghiwit sang mga tigulang sa Cite Soleil area.
Padayon pa subong ang pagkumpirma sa data sang mga napatay kag posible nga survivors halin sa amo nga lugar.
