Masobra 73,000 ka mga trabaho ang itanyag sa nagkalain-lain nga job fairs sa bilog nga pungsod sa Mayo 1, Labor Day.
Suno sa Department of Labor and Employment (DOLE), 73,779 ka mga trabaho ang mangin available sa event nga pasakupan sang 808 employers sa 42 ka job fair sites sa bilog nga pungsod.
Lakip sa mga industriya nga magapartisipar amo ang BPO, manufacturing, financial and insurance activities, manpower services, kag sales and marketing.
Suno sa DOLE, ang nagapanguna nga bakante amo ang customer service representatives, production workers/operators, financial consultants, service crew, kag sales agents ukon sales clerks.
Ang nagapangita sang trabaho ang gina-abisuhan na nga magtipon na sang application requirements kaangay sang resume ukon curriculum vitae, certificate of employment para sa mga naka-trabaho na anay, diploma, kag transcript of records.
Sa inisyal nga impormasyon, ang job fair site sa Western Visayas ang nahamtang sa Robinsons Iloilo.
Magluwas sa job fairs, ginpahayag man sang DOLE nga nag-partner ini sa Department of Trade and Industry (DTI) kag sa Department of Agriculture (DA) agud pangunahan ang “Kadiwa ng Pangulo Para sa Manggagawa” agud mas barato lang ang balaklon sang mga mamumugon sa mismo Labor Day.
