Malapit tunga sa million nga balor sang druga, nakumpiskar sa ginpatigayon nga drug buy-bust operation sang Iloilo City Police Office – City Drug Enforcement Unit (ICPO-CDEU) sa Barangay Sto. Niño Norte, Arevalo, Iloilo City.
Ang mga subject amo sanday Rodel Magampo y Juson, 39, construction worker, kag Norberto Faunillo Jr. y Guillermo, 38, tricycle driver, lunsay mga pumuluyo sang Barangay San Juan, Molo, Iloilo City.
Sa interview sang Bombo Radyo kay Police Captain Ryan Christ Inot, Office-in-charge sang unit, iya ginpahayag nga nadakpan ang mga subject sa bulig sang Body Worn Camera (BWC) kun sa diin nadokumentuhan ang operasyon.
Suno kay Inot, na-recover sa pag-hinakop sang mga subject ang ginabulubanta 65 grams nga suspected shabu nga may standard drug price nga 442,000.00 kag iban pa nga drug paraphernalia
Dugang pa ni Inot, na-monitor sang mga kapulisan nga may yara sang connection ang mga nagkaladakpan nga mga subject sa Muntinlupa kun sa diin amo ang ila nga source of iilegal drugs.
Ang mga nakumpiskar nga mga illegal droga ang igaturn-over sa PNP Iloilo Forensic Unit para sa nagakaigo nga imbistigasyon.
Sa subong, yara na sa kustodiya sang Iloilo City Police Station 6 ang mga subject kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
