Nagpasugot ang Malaysia nga i-resume ang search operations sa eroplano nga nadula 10 ka tuig na ang nakaligad.
Ang missing nga Malaysia Airlines Flight MH370 isa sa ginakabig nga pinakadaku nga misteryo sa patag sang aviation sa bilog nga kalibutan kag ginakabig nga pinakamakamamatay nga kaso sang pagkadula sang aircraft.
Isa ini ka Boeing 777 nga nagakarga sang 227 ka mga pasahero kag 12 crew nga halin sa Kuala Lumpur, Malaysia kag pakadto kuntani sa Beijing, China sang Marso 8, 2014.
Apisar ginlunsar na anay ang ginakabig nga largest search sa aviation history, wala gihapon ini nakit-an kag wala gihapon nahibal-an kun ano ang natabo.
Suno kay Malaysian Transport Minister Anthony Loke, ang proposal nga padayunon ang pagpangita sa 15,000 square kilometer area sa southern Indian Ocean ang naghalin sa exploration firm nga Ocean Infinity. Amo man ini nga kumpaniya ang naglunsar sang search operations para sa amo man nga eroplano apang gintapos ang operasyon sadtong 2018.
Suno kay Loke, makabaton ang kumpaniya sang $70 million kun may makit-an nga bastante nga wreckage ukon mga parte sang eroplano. Amo ini suno kay Loke ang ila kabigon nga makahatag sang closure sa mga himata sang mga biktima.
“Our responsibility and obligation and commitment is to the next of kin,” suno sa transport minister. “We hope this time will be positive, that the wreckage will be found and give closure to the families.”
Nahibaluan nga antes ini, may kumpaniya man halin sa Australia nga nagpangita sa aircraft kag naglawig sang tatlo ka tuig antes gin-untat ang operasyon sang 2017.#
