Ginpa-Bombo sang isa ka residente sang Ungka II, Pavia, Iloilo ang pagtampok sang balas sang Department of Public Works and Highways (DPWH) sa old railway kasunod sang road closure nga nag-umpisa subong nga adlaw sa construction site sang Ungka II flyover sa Pavia, Iloilo.
Sa interview sang Bombo Radyo kay Glen Hondrade, residente sang Ungka II, Pavia, Iloilo kag isa ka seaman, iya ginpahayag nga gintap sang DPWH ang International Builders Corporation (IBC) agud tapanon ang alagyan sa old railway sa diin magalabay ang mga commuters kag salakyan bangud sa alternate route kasunod sang road closure.
Suno kay Hondrade, matapos gintampukan sang balas ang nasambit nga railway, nagkaladagdag ini sa ila drainage system kag nagsupon sa tatlo ka linya sang tamburong nga nagresulta sa pagbara.
Bangud sini suno kay Hondrade, tuman ang ila kahangawa sa tion nga mag-ulan bangud wala sang maagyan ang tubig nga naga-ilig sa ila drainage system bangud ginsupunan sang balas nga nagkalataktak nagikan sa old railway.
Nagpanawagan naman ang natungdan sa DPWH nga kun mahimo, liwaton nila ang ila nga construction sa old railway kag tagaan sang igtalupangod ang ila guba nga drainage system.
