ILOILO CITY – Ginatib-ong sang isa ka grupo ang pagtapna sang mental health problem nga kun kaisa ginatunaan sang pagpanginmatay sang mga lalaki.
Sa interview sang Bombo Radyo kay JM Suelo, isa ka Law student kag founder sang Man Out PH Project, iya ginpahayag nga ang iya gintukod nga grupo ang isa ka platform ukon palaagyan agud nga makabulig sa mga lalaki nga may yara sang problema ukon may yara sang depression.
Sa pagpaathag ni Suelo, ang mga lalaki ang may yara sang mas mataas nga suicidal instinct ipaanggid sa mga babayi.
Ini bangud nga duna sa mga lalaki nga dapat magpakita sang kabakod sa pihak sang mga pagpanghangkat sa kabuhi.
Indi kasubong sa mga babaye nga mas bukas sa pagpanugid sang problema, ang mga lalaki ang ginahatagan sang ‘stigma’ kun magpakita sang kahuyang sa publiko.
Ang mga nasambit nga rason suno sa natungdan ang mga rason kun nga-a iya naisipan nga magtukod sang isa ka community emotional group.
Samtang, ang paglikaw sa bisyo paagi sa workout ang isa sa mga ginatib-ong ni Stance Mitchell, founder sang Barista Street Workout, rason nga nagpakigbahin siya sa Man Out PH Project.
Ginpahayag ni Mitchell nga madamu ang mga nagaliho-liho nga mga pamatan-on sa syudad sang Iloilo.
Agud nga mapahilayo sa bisyo kag malain nga buluhaton, ginpahayag ni Mitchell nga iya naisipan nga itib-ong ang ‘health and fitness’ sa libre nga paagi.
May kaangtanan diri, ginpaathag sang isa ka Psychology graduate kun ano ang kinalain sang sadness ukon kasubo sa depression.
Sa interview sang Bombo Radyo kay Joe Adrian Ibojos, katapo sang Man Out PH Project, iya ginpahayag nga sa masami, ginahuna-huna sang kadam-an nga pareho lang ang kahulugan sang sadness kag depression.
Santo sa pagtuon suno kay Ibojos, ang sadness ukon ang kasubo ang mahimo lamang nga maglawig sa sulod sang pila ka adlaw samtang ang depression naman amo ang pagbatyag sang kasubo, indi pagkahim-os kag pagkadula sang balor kag pagpalangga sa kaugalingon.
Kun ang mga nasambit nga sintomas ang nabatyagan sa sulod sang duha ka semana ukon sa mas malawig pa nga tion, ini ang makabig na nga depression.
Kadungan sini, gin-athag man sang natungdan nga ang mga tawo nga may yara sang depression ang nagakinahanglan sang bulig sang psychologist kag psychiatrist.
Ini bangud nga magluwas sa mental therapy, ang tawo nga mag depression ang nagakinahanglan man nga magtumar sang nagakaigo nga bulong bangud nga ang depression ang makabig man nga mental illness ukon balati-an.
