Ginkalipay sang director sang Jaro Archdiocesan Social Action Center (JASAC) ang desisyon sang International Criminal Court (ICC) Appeals Chamber nga ibasura ang apelar sang kampo ni former President Rodrigo Duterte para sa interim release.
Sa interview sang Bombo Radyo kay Msgr. Meliton Oso, iya ginpahayag nga ang desisyon sang korte ang makabig nga “triumph of justice.”
“Ginalansang naton sa consciousness kag sa tagipusuon sang tagsa ka tawo nga kun may ginhimo ka gani nga malaot, mamalayran ka gid. Te dapat lang nga indi siya pagbuy-an temporarily. Manabat siya, kag ang isa sa pagpanabat sina amo ang pagka-preso,” suno sa JASAC director.
Ginbalikan sini ang record sang simbahan kag sang human rights groups nga masobra sa 30,000 ang nagkalamatay halin sang ginpatuman sang Duterte administration ang drug war. Ini ang mas mataas sangsa 6,000 ka kaso sang pagpamatay nga amo ang yara sa report sang kapulisan.
80-anyos na subong si Duterte kag nagapanawagan ang iya mga taga-suporta nga isa ka inhustisya ang padayon nga pag-detain sa iya sa ICC detention facility sa The Hague, Netherlands.
“Ang mga Duterte supporters nagasiling nga inhustisya. Pero ang dokumento sang Simbahan, [nagasiling na] sobra 30,000 ang napatay sa senseless war on drugs ni Duterte. Just imagine, panumduma: ang mga patay, mga utod, mga lolo, mga lola nga basta lang nagkalatumba kag ginbutangan lang sang ‘huwag tularan.’ Iban gani [nga biktima], mistaken identity pa. Wala due process. Pero siya [si Duterte], ginatagaan gid sang due process,” suno naman kay Oso. Dugang sini: “Panumduma lang ang mga kauturan naton nga nangin balo kag ang kabataan nga nangin ilo.”
Kun humanitarian grounds ang hambalan suno sa iya, may maayo nga pasilidad ang ICC sa Europa para sa mga may edad na kag ginabatyag sa lawas.
“Mas maayo pa gani ang kahimtangan ya, ipaanggid sa 50% nga mga imol nga mga Pilipino diri sa Pilipinas. Better ang iya hiligdaan didto sa The Hague than the situation of so many poor Filipinos in this country. Ang akon ya gina-insister: manabat ang dapat manabat,” pahayag pa ni Oso.
Ang interim release nga ginhingyo ni Duterte amo ang temporaryo kuntani nga kahilwayan sa ICC detainees kun mapamatud-an nila nga wala na sang risgo kun sila ang paguwa-on sa pasilidad sang korte. Ini nga mga risgo nagalakip sang pagpalagyo sa kaso, pagsulit sa krimen, kag pagpahilabot sa imbestigasyon.
Nauna na nga gin-deny sang pre-trial chamber ang appeal ni Duterte sang Oktubre, apang ginpasaka sa Appeals chamber, kag liwat nga gin-deny paagi sa unanimous decision nga ginsapubliko kag ginbasa ni Judge Luz del Carmen Ibáñez Carranza kahapon sang hapon.
Nagapangatubang si Duterte sang tatlo ka counts sang murder bangud sa 49 ka mga pagpamatay nga ginaangot sa iya pagtukod sang death squad nga amo ang sa likod sang pagpamatay sa mga tawo nga gina-suspetsahan nga nagagamit ukon nagabaligya sang iligal nga droga. Marso 11, 2025 sang gindakop ang former president bangud sa amo nga kaso sang crimes against humanity.#
