ILOILO CITY-Ginkalipay sang tagdumalahan sang Iloilo Fish Port Complex ang pagkatukib sang otoridad sa barracks nga ginhimo nga drug den sang mga construction workers.
Kasunod ini sang pagkadakop man sa isa ka foreman kag lima ka construction workers sa isa ka anti-illegal drug operation nga nagresulta sa pagka-rekober sang kapin P1.3 million nga balor sang shabu.
Sa interview sang Bombo Radyo kay Dr. Justo Anaquita, spokesperson sang Iloilo Fish Port Complex, iya ginpahayag nga tatlo na ka tuig sa compound sang Fish Port ang mga construction workers nga nagatrabaho sa gina-rehabilitate nga complex.
Suno kay Anaquita, tinawo sang kontraktor ang nasambit nga mga trabahador.
Ang mga construction workers ang halin sa Bacolod City, Negros Occidental, kag Antique.
Magluwas sa construction workers, may na-monitor man nga iban nga indibidwal sa fish port complex kag empleyado sang isa ka brokerage business nga ginadudahan may kaangtanan man sa iligal nga aktibidad.
Matandaan nga kasunod sang pagkaaresto sang anom ka mga indibidwal, nagpinalagyo man ang kapin 30 ka pa construction workers sang hana sila nga ipaidalom kuntani sa drug test.
