Suportado sang Department of Education (DepEd) Region VI ang pahayag sang DepEd Central Office nga mandatory ang COVID-19 vaccination sa mga manunudlo nga magapartisipar sa pilot run sang limited face-to-face classes.
Sa interview sang Bombo Radyo kay Hernani Escullar, Jr., spokesperson sang DepEd Region VI, iya ginpahayag nga kun bakunado ang mga manunudlo, mangin manubo ang risgo nga matapikan sang COVID-19 ang mga kabataan nga magabalik sa eskwelahan.
Suno pa kay Escular, kun indi naman vaccinated ang mga teachers, maga-focus anay sila sa iban nga modalities kaangay sang modular, radio-based, television-based, kag blended learning.
“Ang teachers nga wala pa nalab-utan sang schedule for vaccination, ma-focus anay sa other means of modalities nga hatag sang DepEd. Pero kun vaccinated na, pwede na nga makatudlo sa limited face-to-face classes.”
Indi man madulaan sang obra ang mga indi fully-vaccinated teachers, suno kay Escullar. “Makatudlo ka man gihapon kay kadamo sang modalities nga ginahatag ang DepEd. Kun vaccinated ka, you have this opportunity nga ma-feel mo ang face-to-face classes.”
Nagpasalig ang DepEd Region VI nga padayon ang pag-coordinate sang ahensya sa Local Government Units (LGUs) agud nga mapasangkad pa ang coronavirus inoculations sa mga manunudlo.
Sa subong, wala pa sang nahatag ang DepEd nga final list sang mga eskwelahan sa Western Visayas nga madala sa 120 schools sa pungsod nga magapatigayon sang pilot implementation sang face-to-face classes.
Sa Iloilo, apat ka mga eskwelahan ang ginrekomenda sang Schools Division of Iloilo:
1. Palanguia National High School – Pototan, Iloilo
2. Granada National High School- Ballesteros Campus – Carles, Iloilo
3. Cabacanan Elementary School – Alimodian, Iloilo
4. Tomas Confesor Memorial Elementary School- Cabatuan, Iloilo
