ILOILO CITY – Epektibo na buwas nga adlaw, Agosto 15, ang mandatory nga pagsuksok sang face shield sa pagsakay sa tanan nga public transport.
Sa interview sang Bombo Radyo kay Land Transportation Office 6 Assistant Regional Director Atty. Gaudioso Geduspan, iya ginpahayag nga may yara sang daku nga katungdanan ang tagsa ka driver nga indi pagpasakyon ang mga pasahero nga wala nagasuksok sang face shield santo sa mandu sang Department of Transportation.
Suno kay Geduspan, mahimo nga i-charge sang reckless driving ang isa ka driver nga nagapasakay sang pasahero nga nagasuksok lamang sang face mask apang wala sang face shield.
Magluwas sa linibo nga multa, mahimo man nga i-suspend ang lisensya sang driver nga wala nagasunod sa nasambit nga pagsulundan.
May kaangtanan naman sa mga pasahero nga madakpan nga wala nagasuksok sang face shield sa pagsakay sa public transport, ginpahayag sang natungdan nga ang silot ang nakadepende sa gin-amyendaran nga existing ordinance tuhoy sa paggamit sang face mask sa tagsa ka Local Government Unit.
Magabuligay ang mga personnel sang Land Transportation Office, Land Transportation Franchising and Regulatory Board, Philippine National Police – Highway Patrol Group kag Public Safety and Transportation Management Office sa pagbantay, pagsaway kag pagdakop sa mga wala nagasunod sa mandatory nga pagsuksok sang face shield.
