ILOILO CITY–Sundon sang Philippine National Police (PNP) ang mandu ni Presidente Rodrigo Duterte nga magahatag sang 5 million pesos sa tagsa ka ninja cops nga mapatay.
Sa interview sang Bombo Radyo kay Police Chief Superintendent John Bulalacao, director sang Police Regional Office (PRO) 6, iya ginpahayag nga madamu pa sang mga scalawag nga pulis nga yara sa listahan sang PNP kag ni Presidente Duterte.
Bisan diri sa rehiyon suno kay Bulalacao, madamu sang mga scalawag nga pulis nga dapat na nga pahalinon sa serbisyo apang gintul-id man sang PNP ang mga nabaton nga impormasyon.
Ang amo nga pronouncement suno kay Bulalacao ang nagapakita lamang kun ano ka seryoso ang presidente sa pagtapna sang nanari-sari nga krimen.
Sa pagkamatuod suno kay Bulalacao, wala na sang rason nga mangin scalawag ang mga pulis bangud sa ginahatag nga benepisyo kag suporta sa ila.
Gin-athag man sang PRO-6 director nga may reward man ukon wala, padayon sa gihapon ang PNP sa ila katungdanan nga dakpon kag hatagan sang silot ang mga naglapas sa layi.