Gin-athag ni Dueñas, Iloilo Mayor Robert Martin Pama nga wala ini nagapanghilabot kun sin-o man ang dakpon sang ila pulis nga nagapatigayon sang illegal quarry operation sa ila banwa.
Sa interview sang Bombo Radyo kay Pama, ginpahayag sini nga ginhambalan gid sini ang hepe nga wala siya sang labot kun sin-o ang dakpon basta may iligal nga buluhaton sa ila nga banwa.
“Hambal ko sa pulis ko, wala ko ya labot kun sin-o man na di ya ang madakpan niyo, dakpa niyo. Basta illegal, dakpa niyo,” suno sa alkalde.
Suno pa kay Pama, nakamuno man siya gani kay Atty. Cesar Emmanuelle P. Buyco, Jr., head, sang Provincial Government Environment and Natural Resources Office (PGENRO), nga indi na siya pagkontakon kun may yara sila sang i-operate nga may illegal quarrying sa Duenas.
Ini agud nga indi na siya madudahan nga basi kun pahibaluon sini ang illegal nga naga-quarry agud nga makapalagyo sa PENRO.
Nahibaluan nga isa ang Barangay Cabudian sa Duenas sa mga barangay kun sa diin nagpatigayon sang anti-illegal quarry operation ang PENRO sang Abril 29.
Sang amo nga tion, may mga na-recover nga mga heavy equipment kaangay sang apat ka backhoe kag isa ka payloader apang naka-lock na kag wala na sang driver.
Didto kag naggwa ang impormasyon nga basi kun may nakapahibalo sa ila nga may operasyon ang PENRO kag nagpahayag man ang opisina nga may mga ma-impluwensya nga tawo sa likod sang quarrying.
Ginkumpirma man ni Mayor Pama nga wala gid man sang nahatagan nga permit kag wala gid siya sang na-endorso agud nga magpatigayon sang quarrying sa amo nga barangay.
Una naman nga nagpanindugan ang punong barangay sang Cabudian sa interview sang Bombo Radyo nga wala ini nakahibalo nga may illegal quarrying sa ila lugar.#
