ILOILO CITY – Padayon pa nga ginahulat sang Mandurriao Police Station ang desisyon sang pamilya kun ipaidalom sa autopsy ang lawas sang electrician nga nasapwan nga wala na sang kabuhi sa isa ka boarding house sa Barangay Bolilao, Mandurriao.
Ang lalaki ang ginkilala kay certain Erberto sang Pototan, Iloilo.
Sa interview sang Bombo Radyo kay Police Captain Val Cambel, hepe sang Mandurriao Police Station, iya ginpahayag nga nagreklamo ang isa sa mga occupants sang boarding house nga may nagabaho na sa lugar.
Sang ginchekyar ang hulot sang lalaki, nakita ang lawas sini nga yara na sa advanced state of decomposition.
Suno kay Cambel, Huwebes pa sang ulihi nga nakita nga buhi ang lalaki.
Sa imbestigasyon naman sang katapo sang Scene of the Crime Operations, wala sang may nakita nga anuman nga senyales nga may natabo nga pagpinugusay, wala nagalapta kag intact ang mga gamit sang electrician.
Dako naman ang pagpati sang kapulisan nga wala sang may natabo nga foul play apang gina-enganyo ang pamilya sang biktima nga ipaidalom sa autopsy ang lawas sang lalaki.
