ILOILO CITY–Daku nga pagpanghangkat para sa Mandurriao PNP ang pagsolbar sa pag-ambush patay sa pinuno sang Amazona Brigade nga si Mercedes “Ging-Ging” Nava sa Brgy. Calajunan, Mandurriao, Iloilo City.
Sa interview sang Bombo Radyo kay Police Chief Inspector Marlon Valencia, hepe sang Mandurriao Police Station, iya ginpahayag nga nakasuksuk sang jacket kag nakahelmet ang duha ka mga suspek nga sakay sang motorsiklo.
Magluwas nga indi makita ang guya sang mga suspek, wala man sang plaka ang ginasakyan nga motorsiklo sang mga suspek.
Santo sa kuha sang Closed Circuit Television (CCTV) sa lugar, gilayon nga nagburhot ang motorsiklo sa direksyon sang Forest Lake Cemetery matapos ang pag-ambush kay Nava.
Kun basehan lang ang kuha sang CCTV suno kay Valencia, buron ang ila nga imbestigasyon rason nga kinahanglan nila nga makuha ang pahayag sang mga posible witness nga nakakita gid sa guya sang mga suspek.
Samtang, indi pa matumod sang Mandurriao PNP kun ano gid ang motibo sa pag-ambush patay sa pinuno sang Amazona Brigade nga si Mercedes “Ging-Ging” Nava sa Brgy. Calajunan, Mandurriao, Iloilo City.
Sa interview sang Bombo Radyo kay Police Chief Inspector Marlon Valencia, hepe sang Mandurriao Police Station, iya ginpahayag nga may tatlo ka mabaskog nga anggulo sila nga ginasundan sa motibo sa pag-ambush kay Nava kag kay Edwin Fontillas alyas Erwin.
Lakip sa mga anggulo nga ila ginasundan amo ang tuhoy sa ginkaulamiran nga estafa case ni Nava, ang iya nga pagbuyagyag sang ginapahayag peke nga signature campaign batok sa  Panay Electric Company (PECO) kag ang ginapahayag kaangtanan sa illegal nga druga.
Kun bahin sa kwarta ang motibo, may yara sang pending nga estafa case sa korte nga ginakaulamiran si Nava.
Kun bahin naman sa PECO controversy, ginpahayag ni Valencia nga nakabuya sang pahayag ang pamilya sang biktima nga wala man sang may naka-away si Ging-Ging Nava magluwas sa iya pakaisa nga si Iloilo City Councilor Plaridel Nava.
Kun illegal drugs naman ang pagahambalan, may yara sang pangalan nga certain “Ging-Ging” ang nagaguwa nga naangot sa illegal drugs.
Indi lang matul-id suno kay Valencia kun sin-o nga Ging-Ging ang ginatumod nga naangot sa illegal drug trade.