ILOILO CITY – May persons of interest na ang Mandurriao Police Station sa natabo nga kinagamo sa Diversion Road, Mandurriao, Iloilo City.
Sa interview sang Bombo Radyo kay Police Lieutenant Benjie Dicen, deputy station commander sang Mandurriao Police Station, iya ginpahayag nga may mga pangalan na sila nga ginakaptan apang indi pa masapubliko bangud may mga menor-de-edad nga na-ulamid.
Sa inisyal nga imbestigasyon sang Mandurriao Police Station, ang apat ka mga sakay sang pick-up ang nagabyahe sa Diversion Road agud nga magpahangin.
Samtang, ang mga pamatan-on naman ang nagikan sa isa ka birthday party kag pauli na kuntani sa ila mga balay sa City Proper.
Sang naglabay na ang pick-up sa grupo sang mga pamatan-on, hinali lang nga nakabati sang lagapok kag gahud nagikan sa mga kabataan.
Gin-verify sang mga sakay sang pick-up ang amo nga gahud kag posible nga didto na may natabo nga indi pag-intindihanay sa duha ka bahin nga nagresulta sa komosyon.
Suno kay Dicen, apat ang sakay sa pick-up samtang ang mga bata naman nga nagapungko sa higad sang dalan nga nagabantay sang masakyan pauli ang ginabanta 10-15 ka bilog.
Sa video nga nakuha sang Bombo Radyo, makita nga ginalagas pa sang mga pamatan-on ang pick-up apisar nga naglakat na ini.
Gilayon nga napadulong sa police station ang mga sakay sang salakyan.
Dugang pa ni Dicen, wala naka-inom ang mga sakay diri.
Kalabanan sa mga naulamid sa gamo ang mga estudyante pa lamang base sa pag-verify sang kapulisan.
Kasunod sini, nagmandu na si Iloilo City Police Office Director Police Colonel Leo Batiles nga dugangan pa ang personnel nga nagalibot sa lugar, pabaskugon pa ang mobile patrolling, deployment sang motorcycle cops kag police presence tubtob nga magsanag na ang palibot.
Natalana naman nga ipatawag sang kapulisan ang magtimbang nga bahin lakip na ang ginikanan sang mga menor de edad agud nga ma-refer sa Women and Children Protection Desk.
Sa interview sang Bombo Radyo kay Batiles, iya ginpahayag nga may yara sang ginapatigayon nga checkpoint sa pulo ka mga boarder sa syudad agud nga masiguro nga wala sang may nagadala sang armas.
Ginmandu man niya ang pagpatigayon sang “operation bakal” kag “operation sita” sa mga ilimnan sa syudad.
Nagpahanumdom naman sa publiko si Batiles nga maghalong gid kadungan sang Dinagyang Festival kag magkooperar sa mga kapulisan.
Humalin sang Enero 13, epektibo na ang gun ban sa syudad sang Iloilo bangud sa Dinagyang Festival.
