TOKYO, JAPAN – Ginpasundayag sang probinsya sang Guimaras ang manggaranon nga kultura paagi sa pagpasakop sa tuigan nga Philippine Christmas Festival sa Yoyogi Park, Tokyo, Japan.
Ini ang una nga kahigayunan nga naimbitaran ang Manggahan Festival sa nasambit nga kahiwatan nga ginpatigayon halin kahapon, Nobyembre 30, tubtob subong nga adlaw.
Sa interview sang Bombo Radyo kay Guimaras Governor Samuel Gumarin, iya ginpahayag nga wala siya naglaum nga tuman gid ang pagbaton sang mga taga-Japan sa performance sang Manggahan Festival.
Maka-apat ka beses nga nagpasundayag ang Manggahan Festival nga ginabug-usan sang 12 ka manug-saot kag walo ka drummers.
Bug-os man nga naghatag sang suporta ang Guimaras Provincial Government bangud siya mismo suno kay Gumarin kaupod ang tatlo ka opisyal sang Guimaras ang personal nga nagpadulong sa Japan.
Suno kay Gumarin, isa ka daku nga kahigayunan nga mapakita sang probinsya ang world-class performance.
Nalipay man si Gumarin nga makit-an ang madamo nga Overseas Filipino Workers ilabi na ang mga Ilonggo nga nag-enjoy sa palaguwa-on.
Magluwas diri, opisyal man nga gindeklarar bilang Grand Winner ang probinsya sang Guimaras sa Best Booth sa Philippine Christmas Festival sa subong nga tuig.
Sa Good Morning Philippines program, ginpahayag ni Bombo International Correspondent Josel Palma, gin-ugyunan gid sang panahon ang ginakabig pinakadaku nga pista sang mga Pilipino sa Japan.
Ginkalipay man sang mga tumalan-aw ang pang-Pinoy nga pagkaon kaangay sang Puto Bong Bong, Bibingka kag iban pa.
Wala man nagpaulihi ang mga Filipino artists bangud yara man sa event sanday Yeng Constantino, Arnel Ignacio, Ronnie Liang, Bless4 Musical Ensemble, Mr. Joaquin, ang new K-Pop generation kag iban pa nga mga local artist.
Nahibaluan nga ini na ang ika walo nga tuig sang paghiwat sang Philippine Festival kag subong nga tuig ini ang may tema nga “Pasko ng Bayan.”
