ILOILO CITY- Pilason ang duha ka mga magulang matapos ginlabo kag ginkagat sa dulunggan sang ila manghod sa Brgy. Cordova Norte, Tigbauan, Iloilo.
Ang mga biktima amo sanday Raymund Taras,43, sang Brgy. Barusong kag si Rommel Taras, 41, sang Brgy. Nagba sang amo man nga banwa samtang ang suspek amo si Robert, 34, sang Cordova Norte.
Sa interview sang Bombo Radyo kay PCapt Mary Jane Panes, hepe sang Tigbauan Municipal Police Station, iya ginpahayag nga base sa imbestigasyon, nagainum-inom ang tatlo sang hinali lang nga nagbaisay si Rommel kag Robert tubtob nga nagpukotay ang mga ini.
Suno kay Panes, gintambagan pa ni Raymund ang duha apang nagkuha sang binangon ang manghod kag ginlabo ini sa liog.
Napilasan man ang 41-anyos nga magulang sa dulunggan matapos nga ginkagat siya sang manghod.
Preso na sa subong sa Tigbauan Municipal Police Station ang manghud samtang padayon nga ginabulong sa ospital ang duha ka mga magulang.
