Patay ang 46-anyos nga lalaki matapos ginlabo sang iya kaugalingon nga magulang sa Brgy. Abilay, Maasin, Iloilo.
Ang biktima amo si Julian Montefrio, 46, samtang ang suspek amo si Teddy, 52, lunsay mga residente sang nasambit nga lugar.
Sa interview sang Bombo Radyo kay Police Major Jose Nemias Pamplona, hepe sang Maasin Municipal Police Station, iya ginpahayag nga suno sa amay sang mag-utod, nagpuli ang mga ini nga hubog na kag nagabaisay sa diin ginkuha sang magulang ang binangon kag ginlabo ang iya manghud.
Suno sa natungdan, nakaagom sang pilas sa magtimbang nga kamot ang biktima kag sa iya liog nga gintunaan sang iya kamatayon.
Nag-surrender man ang suspek sa mga kapulisan dala na ang gingamit sini nga binangon nga ginabanta 25-inches ang kalabaon.
Ginahulat pa sang awtoridad ang desisyon sang pamilya kun pasakaan sang kaso ang suspek.
(Text and interview: Bombo Marie Sol Biñas)
