ILOILO CITY – Patay ang manghod matapos ginhatok-hatok labo sang iya magulang sa Sitio Malipayon, Barangay Domingo, Sara, Iloilo.
Ginkilala ang biktima nga si Russel Acosta, 45, samtang ang suspek amo ang iya man lang magulang nga si Antonio Acosta, 57.
Ginpahayag ni PO2 Renel Panes sang Sara PNP sa interview sang Bombo Radyo Iloilo, nga pagkatapos magtanom sang mais, ginhagad sang suspek ang manghod nga updan ini magtulog sa iya payag,
Antes magtulog, nag-inom-inom ang mag-utod.
Pagbugtaw sang aga, nakibot na lang ang suspek nga si Antonio nga duguon na ang iya utod kag puno sang labo.
Ulihi na nareyalisar sang suspek nga siya ang naglabo sa kaugalingon nga manghod gamit ang duha ka binangon.
Gilayon naman nagsungka ang suspek sa asawa sang iya manghod.
Suno kay PO2 Panes, may epilepsy ang suspek magluwas pa nga ini ang nagalakat kun tulog ukon sleepwalking kag indi na mahibaluan ang ginapanghimo.