ILOILO – Nagapati ang pamilya nga makapauli nga buhi ang himata nga Ilonggo sefarer nga crew sang naglugdang nga Gulf Livestock 1 sa Japan.
Sa interview sang Bombo Radyo kay Krizza Joy Pelenia Alcahupas, manghod sang Seafarer nga si Romil Pelenia, iya ginpahayag nga hugot ang ila pagpati nga buhi kag makapauli ang ila himata.
Suno may Alcahupas, naka-istorya pa siya sa magulang nga si Romil apang nagadula-dula na ang signal bangud nagabiyahe ang barko halin sa New Zealand padulong sa China
Sa pagkamatuod suno kay Alcahupas, nakakontak pa kay Romil ang kahagugma sini nga yara sa Metro Manila antes pa natabo ang insidente.
Sang Miyerkules sang aga, Setyembre 2, nakapakig-angot pa ang nobya sang iya utod kun may balita na tuhoy sa natabo sa Gulf Livestock 1 kag nag-send pa sang picture sang naglugdang nga barko.
Nagpakig-angot man sila sa ila himata nga seaman kag ginhambalan sila nga indi magpakulba bangud madamo man sang barko ang Korpil Ship Management and Manning Corporation.
Sang masunod nga adlaw, didto na nila nakumpirma nga naglugdang ang barko nga ginasakyan ni Romil nga natalana nga magpauli sa masunod nga bulan.
