ILOILO CITY – Nagpaandam ang Department of Trade and Industry sa mga mahilig sa online shopping nga mangin maid-id sa pagbakal agud nga malikawan ang scam.
Ini ang may kaangtanan sa reklamo sang 20 anyos nga lalaki nga nagbakal sang laptop nga nagabalor sang masobra sa P20,000 apang sang nag-abot na ang order, tatlo ka bato ang unod sang parcel.
Sa interview sang Bombo Radyo kay DTI Iloilo Provincial Director Felisa Judith Degala, iya ginpahayag nga nagakadapat nga latawon ang detalye sang produkto lakip na diri ang detalye sang seller agud makasiguro.
Suno kay Degala, importante nga hibaluon kun lisensyado ang online seller kag mas makapaayo nga cash on delivery na lang ang mode of transaction ilabi na kun mahal ang bili sang pagabaklon nga produkto.
Sa bahin sang natabo sa tagreklamo, ginpahayag sang natungdan nga mahimo nga magpalab-ot sang formal complaint sa Department of Trade and Industry kag ang ahensya na mismo ang magaserbe nga taytay agud nga masolusyunan ang nasambit nga problema.
