ILOILO CITY- Tuman ka makahalalit sa mangroves ukon bakhawan sa Dungon Creek ang ginbutang nga crane way para sa ginatukod nga foot bridge sa Esplanade 3 sa Syudad sang Iloilo.
Sa interview sang Bombo Radyo kay Engr. Nilo Jardeleza, isa ka civil engineer kag myembro sang Philippine Institute of Civil Engineers, iya ginpahayag nga ginabalabagan sang gintumpok nga bato kag duta ang pag-ilig sang tubig pasulod kag pagwa sa Dungon creek.
Suno kay Jardeleza, apisar may yara sang tamburong sa crane way, indi sini maakomodar ang volume sang tubig pasulod sa Dungon creek sa tion sang high tide ukon taob.
Ginpahayag sang civil engineer nga magaresulta ini sa paghuyos sang mangroves bangud indi bastante ang tubig para maghatag sang moisture nga ginakinahanglan sini, kag mahimo nga kabangdanan sang kamatayon sang mangroves.
Ginpaathag sang natungdan nga tuman ka importante ang papel sang mangroves bangod nagaserbi ini nga water purifier/cleaner/filter.
Dugang pa niya nga apisar padasigon pa sang contractor sang foot bridge ang pagtapos sang proyekto, apang ang masobra isa ka bulan nga pagtinir sang crane way ang pat-ud nga makaapekto indi lang sa mangroves kundi sa iban nga nagakabuhi nga organismo sa creek ukon sa suba.
Ginakabig man niya nga kulang lang sa diskarte ang contractor sang proyekto bangud wala sini nadumduman nga maggamit sang iban nga alternatibo kaangay sang bridge panel sa baylo nga crane way.
