TIGBAUAN, ILOILO – Patay ang isa ka mangunguma matapos ginlambatan kag ginpaarakan-luthang sang armado nga grupo sa Brgy. Supa, Tigbauan, Iloilo.
Ang biktima amo si George Jutay alyas Joe, legal ang edad, pamilyado kag residente sang Brgy. Nanga, Guimbal, Iloilo apang may yara sang ginatala-uma nga duta sa Brgy. Supa sa banwa sang Tigbauan.
Sa interview sang Bombo Radyo sa hinablos sang biktima nga nagpahinago sang pangalan, iya ginpahayag nga nagalakat ang iya tiyo sang ginlambatan sang armado nga grupo kag ginpaarakan sang luthang.
Ginapahayag nga magluwas sa luthang, ginsapote pa ang biktima apang nakabalos pa ini sa pagpalupok sa mga suspek.
Suno sa hinablos, wala lang nahibalu-an kun bala may napilasan sa bahin sang armado nga grupo.
Naga-isahanon lamang nga nagatinir sa Brgy. Supa ang biktima kag malaka lamang nga nagapauli sa ila balay sa banwa sang Guimbal.
Ginpahayag sang hinablos nga may yara sang dala nga armas-luthang ang iya tiyo bilang proteksyon sa kaugalingon.
Sa subong, padayon pa nga ginahibalo ang identity sang mga suspek.
