Patay ang mangunguma kag manogbaligya sang utan sa Barangay Tabug, Alimodian, Iloilo matapos natiruhan sang wala pa makilalal-an nga mga kalalakihan.
Ang biktima amo sanday Rio Agudo, 46-anyos, isa ka mangunguma kag residente sang nasambit nga barangay; Roquita Cantomayor Dolar, 50-anyos, manugbaligya sang utan, kag residente sang Sitio Tabionan, Brgy. Bucari, Leon, Iloilo.
Sa interview sang Bombo Radyo kay Police Captain Marion Asparo, Hepe sang Alimodian Municipal Police Station, iya ginpahayag nga magalawig kontani sang karbaw si Agudo kag hinali nga gintiro sang duha ka kalalakihan nga nakasuksok sang bonnet.
Samtang, nadalahig naman sa pagpangluthang si Dolar nga mamyesta lang man kontani sa amo nga barangay.
Suno kay Asparo, ginsundan sang mga suspek si Agudo antes nakakuha sang tyempo agud himuon ang krimen.
Nag-agum sang patal nga pilas sa ulo si Agudo kon sa diin, nadagdag pa ini sa pil-as kasunod sang pagpangluthang.
Pilas naman sa lawas ang naagum ni Dolar nga nagtuga man sang iya kamatayon.
Gindala pa ang duha sa Aleosan District Hospital apang gindeklarar nga dead-on-arrival.
Na-recover sang otoridad sa crime scene ang caliber 45 pistol kag duha ka empty shells sang amo nga unit sang armas.
Ginalantaw naman ang anggulo nga personal grudge kag pagpangawat ang motibo sang mga suspek sa paghimo sang krimen.
