ALIMODIAN, ILOILO – Indi na luyag sang isa ka mangunguma nga hatagan sang problema ang iya mga utod bangud sa iya nga kondisyon.
Ini ang ginpatihan motibo sa pag-suicide ni Rene Amoto, 24 anyos, sang
Barangay Sinamay, Alimodian, Iloilo pinaagi sa paglaslas sang iya puwak.
Sa interview sang Bombo Radyo kay Police Lt. Danilo Noca, hepe sang Alimodian Municipal Police Station, iya ginpahayag nga nagapati ang pamilya ni Amoto nga wala sang foul play sa iya kamatayon bangud nga wala man ini sang kontra sa ila nga lugar.
Nakit-an na lamang si Amoto sang iya nga manghod sa sulod sang ila nga balay nga dugo-on.
Suno kay Noca, gingamit ni Amoto sa paglaslas sang iya puwak amo ang sanggot.
Antes pa man natabo ang insidente, natulupangdan pa sang pamilya nga daw kaangay nga nagapalangluya si Amoto kag nagpangayo pa sang bulong bangud nga nagasakit ang iya gusok.
Ginkilala sang pamilya nga mabuot sahi sang tawo si Amoto apang wala ini nagapanugid sang iya nga problema kag ginatago niya lamang sa iya kaugalingon.
