ILOILO CITY – Arestado ang isa ka mangunguma sa ginpatigayon nga drug buy bust operation sa Tupas St., Poblacion, Barotac Viejo, Iloilo.
Ang durugista amo si Randy Lamera, 42, residente sang Barangay Cabugao Norte, Sta. Barbara Iloilo.
Nakuha sa iya ang ginabanta 74 grams sang shabu nga may standard drug price nga P503, 200.
Sa interview sang Bombo Radyo kay Police Major Ciriaco Esquilarga, hepe sang Barotac Viejo Municipal Police Station, iya ginpahayag nga personal nga nagapadulong si Lamera sa nasambit nga banwa agud lamang nga magbaligya sang iligal nga droga sa tion nga may magbakal sa iya.
Dugang pa niya, wala sang temporaryo nga balay si Lamera sa Barotac Viejo bangud nga nagalusot-lusot lamang ini sa nasambit nga banwa.
Sang nagligad nga mga inadlaw, na-monitor sang kapulisan nga may tuyo ini nga magsulod sa amo nga banwa agud nga magbaligya sang droga.
Magluwas sa Barotac Viejo, nagabaligya man ini sang droga sa Pavia, Sta. Barbara, kag sa kaiping nga mga banwa.
Ginpahayag dugang ni Esquilarga nga antes ang ginpatigayon nga operasyon, gin-ako sang durugista nga naggamit ini sang iligal nga droga.
Samtang, gintu-ad man ni Lamera nga indi niya kilala ang ginakuha-an niya sang droga bangud nga nagapakig-angut lamang ini pinaagi sa cellphone.
Sa subong, preso sa Barotac Viejo Municipal Police Station si Lamera kag magapangatubang sang kaso nga paglapas sa Section 5 kag 11 sang Republic Act 9165 ukon Comprehensive Dangerous Drugs Act of 2002.
