JANIUAY, ILOILO – Nagakabalaka ang mga mangunguma sa Janiuay, Iloilo sa posibilidad nga madulaan sila sang palangabuhi-an bangud sa pagnubo sang presyo sang humay.
Sa interview sang Bombo Radyo kay Jerry Dela Cruz, isa ka manug garab sa nasambit nga banwa, iya ginpahayag nga madugay na siya nga nagapanggarab kag ini na ang iya nga palangabuhi-an.
Suno kay Dela Cruz, kun padayon ang pagnubo sang presyo sang humay, mabudlay para sa iya ang pagsagod sa tatlo ka mga kabataan ilabi nga may duha siya ka ginapa-eskwela.
Sa subong suno kay Dela Cruz, haluson sila makakaon sang tatlo ka beses sa isa ka adlaw bangud sa kakulang sang budget.
Kun sadto suno sa natungdan, nagasuhol siya sang P500 sa isa lang ka paggarab apang sa subong, nagalab-ot na lang sa P100 tubtub P200 ang iya masuhol.
Ang pagnubo sang iya suhol suno kay Dela Cruz ang tuga sang pagnubo sang presyo sang humay sa P11 gikan sa P18 kada kilo.
Magluwas diri, isa man sa rason suno kay Dela Cruz amo ang wala sang limit nga pag-import sang bugas bangud sa Rice Tarrification Law.
Kun tani suno kay Dela Cruz, masulusyunan sang gobyerno ang ginabakho sang mga mangunguma.
