SARA, ILOILO – Kuhaon kuntani sang mangunguma ang iya karabaw malapit sa suba sa Barangay Del Castillo, Sara, Iloilo apang naanod ini sang baha kasunod sang pabubo sang ulan.
Ang biktima amo si Arjun Publico, 24 anyos kag residente sang nasambit nga barangay.
Sa interview sang Bombo Radyo kay Mary Rose Publico, pakaisa sang biktima, iya ginpahayag nga naglisensya si Arjun nga malakat ini agud nga kuhaon ang iya karabaw sa kilid sang suba sang gilayon man nga nagbubo ang manunog nga ulan sang Disyembre 2 sang gab-i.
Suno kay Publico, malayo pa ang nahamtangan sang karabaw gikan sa balay sang biktima.
Bangud sa mamunog nga ulan, nagtaas ang tubig sa suba sa diin wala na natigayon pa nga makuha sa higot ang karabaw.
Nakit-an na lang si Arjun, aga na sang Disyembre 3 sa diin wala na ini sang kabuhi kag may pilas sa ulo nga mahimo tuga sang pagkatumba sini ukon pagkabunggo sa bato.
