Mangyan, agaw atensyon sang magsuksok lang sang bahag sa graduation sini sa Iloilo

Agaw atensyon ang isa ka Mangyan sang ginkuha sini ang iya diploma suksok ang tradisyunal nga bahag sa graduation sini sa kolehiyo sa Iloilo.

Sa interview sang Bombo Radyo kay Anthony Suday, ginpahayag sini nga antes pa man siya naka eskwelaha sa kolehiyo, simple lang ang ila pangabuhi sa ila Tribu Alangan sa Mayba Pag-asa, Occidental Mindoro.

Suno kay Suday, sang elementary, nagalakat lang ini sang duha ka oras padulong sa ila eskwelahan sa Mindoro.

Bangud nagdako sa kapigaduhon, mismo ang amay ni Suday ang nagtulod sa iya nga makatapos sa pagtuon.

Nahatagan naman sang kahigayunan si Suday nga maka-eskwela matapos ginbuligan sang guardian sini nga si Rene Sausa sang nagbisita ini sa Tribu Alangan sa Occidental Mindoro.

Ginpadayon naman ni Suday ang iya sekondarya sa Balasan National High School sa Balasan, Iloilo tubtub makasulod sa kolehiyo sa Northern Iloilo State University (NIPSC) Batad Campus.

Bangud nagdako sa panguma, napili ni Suday ang kurso nga Bachelor of Science in Agriculture.

Nahibaluan nga si Suday ang pinakauna nga myembro sang Indigenous Peoples (IP) nga nakakuha sang college degree sa bilog nga NIPSC system.