ILOILO CITY — Ginaduso sang pila ka mga progresibo nga grupo sang drivers kag operators sa Iloilo nga dapat ikonsidera ang ila hinun-anon kasunod sang plano nga idagdag ang show cause order batok sa mga unconsolidated jeepneys sa Region 6.
Sa interview sang Bombo Radyo kay Warren Jayson Gangoso, chairman sang Samahang Manibela Mananakay at Nagkaisang Terminal ng Transportasyon ukon Manibela – Panay, iya ginpahayag nga tuman ang ila preparasyon agud hiwaton ang hublag protesta para iplab-ot sa Land Transportation Office (LTO) kag Land Transportation Franchising and Regulatory Board (LTFRB) ang ila ginaduso nga “human consideration”.
Suno kay Gangoso, sila ang may palangabuhian kag indi isa ka hampanganan ang ila ginaduso nga Public Utility Vehicle (PUV) modernization sa diin may kinahanglan sila nga pakan-on sa matag-adlaw nga tanan.
Ginpahayag man sini nga kinahanglan nila nga mag-isa agud itib-ong ang kinamatarung sang tagsa ka driver kag operator nga nadulaan sang palangabuhian.
Nahibaluan nga naghiwat subong nga adlaw ang Manibela Panay kag pila ka mga progresibo nga grupo sang hublag protesta batok sa gobyerno kasunod sang pagtakop sang 15 days nga leeway para sa mga unconsolidated operators and drivers.
Sugod subong nga adlaw, makabig na nga colorum ang mga wala naka-consolidate nga public utility vehicle sa pungsod, sa diin mahimo na sila nga dakpon sang LTO sa dalan.
