ILOILO CITY- Nagsabat ang Assistant Department Head sang Office of the Civil Registry sa Syudad sang Iloilo matapos ginbasol ini sang City Civil Registrar kun ngaa wala pa nabaton sang mga empleyado sang opisina ang ila sweldo sa bulan sang Mayo kag midyear bonus.
Sa interview sang Bombo Radyo Iloilo kay Cherie Ampig, iya ginpanindugan nga si Mr Juncae Manikan, ang head sang talatapan, ang balasulon kun ngaa wala pa na-release ang ila sweldo tubtob subong.
Suno kay Ampig, nag-ugat ang problema sang ginhold sang City Accounting Office ang ila payroll bangud nga nalakip ang pangalan ni Joe Mari Esteral nga ginpahalin na sang Pebrero.
Ginpahayag niya nga ginkakibot nila kun ngaa ginlakip ang pangalan ni Esteral bangud ang orihinal nga payroll nga una nga ginpasa nila kay Manikan ang wala nagalakip sang pangalan ni Esteral.
Asst. Local Civil Registrar
Dugang pa ni Ampig, wala nag-agi sa ila payroll master ang nasambit nga dokumento kag wala man sila sang ihibalo kun paano ini nakasulod sa budget ang para kay Esteral kag nakalab-ot pa sa Accounting Office.
Gin-athag niya nga ginpalab-ot nila kay Mr. Manikan ang nasambit nga problema baliskad sa pahayag ni Manikan nga wala siya ginpahibalo tuhoy sa suhestiyon ni City Accountant Michelle Lopez nga iseparar lang ang pagproseso sang payroll sang mga empleyado kag ang iya ni Esteral ang ipaagi lang sa voucher santo man sa rekomendasyon ni City Legal Officer Atty. Edgar Gil.
Local Civil Registrar
Sa subong suno kay Ampig, may bag-o nga payroll ang Office of the City Civil Registry nga wala na ginlakip ang pangalan ni Esteral nga ila ginpasa sa opisina ni Manikan sang Hunyo 3 apang tubtob subong wala sa gihapon ini mapirmahan.
