Wala gin-aprubahan sang International Olympic Committee (IOC) ang request sang Pilipinas nga pahampangon ang eight-division former world champion nga si Manny Pacquiao sa 2024 Paris Olympics.
Ginsapubliko sang Philippine Olympic Committee ini nga development subong nga adlaw, Pebrero 18, matapos nabaton ang formal letter halin sa IOC kun sa diin nakasaad nga indi na pwede ang Pinoy boxing legend sa Summer Games bangud lapaw na ini sa age limit.
Naga-edad na subong si Pacquiao sang 45-anyos nga lima ka tuig nga mas tigulang ipaanggid sa age regulation nga 40-anyos.
“Too bad our beloved boxing icon is disqualified because of his age and that everyone needs to go through qualifiers, in all sports, to be able to participate in Paris,” suno sa statement nga ginpaguwa ni POC president Abraham “Bambol” Tolentino.
Sa sulat sang IOC, ginpaathag ni James Macleod, IOC Director for National Olympic Committee Relations, nga napadala na sang iya opisina sa nagkalain-lain nga national olympic committees (NOCs) kag boxing federations ang qualification system para sa Paris Games kun sa diin nalakip diri nga 40 lamang ang age limit.
Gindugang man sang POC nga indi man maka-qualify si Pacquiao paagi sa Universality rule nga amo kuntani ang ginahatag sa national athletes nga wala nakakuha sang tickets paagi sa normal qualifiers.
Nahibaluan nga may siyam ka universality slots nga ginahatag — lima sa babayi kag apat sa lalaki — agud nga makasulod sa Olympics.
Matandaan nga sa request kuntani sang Pilipinas agud nga makahampang si Pacquiao sa Olympiada, ginrason nga may yara ini sang “star power” bilang boxing legend nga mahimo magamit agud ma-promote ang boksing sa bilog nga kalibutan.
Mangin ang former senator ang nagpahayag man nga antes pa man siya nagsulod sa professional boxing, handum na niya nga makasulod kuntani sa national team kag marepresentar ang Pilipinas sa Olympics.
Sa nagligad nga Olympiada sa Japan, apat ka mga boksidor ang nagtiglawas sa Pilipinas nga amo sanday Nesthy Petecio kag Carlo Paalam nga pareho nga silver medalists; Eumir Marcial nga bronze medalist; kag Irish Magno nga tumandok sang Iloilo.
Para naman sa Summer Games subong nga 2024 sa Paris, France, si Marcial pa gid lamang (as of press time) ang kuwalipikado nga Pinoy boxer.#
