Yara sa ika-11 nga pwesto si eight-division world champion Manny Pacquiao sa listahan sang 50 Greatest Boxers of All Time nga ginpaguwa sang The Pugilist — isa ka boxing magazine.
Nagapanguna sa listahan amo si American boxer Sugar Ray Robinson nga may 179 wins, 19 loses, 6 draws kag 106 knockouts.
Nakasulod si Pacquiao sa listahan bangud sa iya madinuagon nga karera sa nakaligad nga duha ka dekada sa diin walo ka mga titulo sa nagkalain-lain nga dibisyon ang iya nakuha.
Sa subong, si Pacquiao sa gihapon ang nagakapot sang World Boxing Association (WBA) welterweight belt kag isa sa ginakabig nga living legend sa boxing.
Sa edad nga 41 anyos, mabakod pa sa gihapon ang Pinoy champion sa diin nakit-an ang kapagsik sini sa iya duha ka mga hampang sang tinalikdan nga tuig batuk kanday Adrien Broner kag Keith Thurman.
Natalana pa nga depensahan ni Pacquiao ang iya titulo sa oras nga matapos na ang coronavirus disease (COVID-19) pandemic.
