Indi lang potensyal nga world title fight ang balantayan kay former eight-division world boxing champion Manny Pacquiao kundi isa ka pelikula!
Ini bangud maga-upod sa isa ka upcoming action movie ang Pinoy boxing legend kag ang American-Korean actor nga si Ma Dong-seok ukon kilala nga si Don Lee kag ang parte sini nga pelikula ang iga-shoot mismo diri sa Pilipinas.
Suno kay anay Ilocos Sur Gov. kag movie producer Chavit Singson, nakakit-anay na ang “Pambansang Kamao” kag ang “Train to Busan” actor para sa sini nga proyekto nga natalana nga magalakip sang expertise ni Manny nga boksing.
Wala pa sang kumpleto nga detalye nga ginpaguwa apang kabahin ang Pilipinas sang lokasyon sang action movie bangud plano man ni Lee nga magtukod sang studio diri sa pungsod particular sa Vigan.
Sang Abril, nagkit-anay man sanday Pacquiao kag Lee sa South Korea kun sa diin ginsiling sang South Korean actor nga fan siya ni Pacquiao kag nakapangayo pa anay ini sang autograph para sa Big Punch Boxing Club.
Magluwas nga kilala sa iya performance sa “Train to Busan,” kilala man si Lee sa iya papel sa “Eternals” sang Marvel.
Sa pihak nga bahin, magluwas sa boksing kag pulitika, nakalusot man ang show biz commitments sa karera ni Pacquiao lakip ang katapusan sini nga pelikula nga WAPAKMAN nga nangin Metro Manila Film Festival (MMFF) entry sang 2009.
May yara man ini sang documentary film nga “Manny” nga napaguwa sang 2015.
