ILOILO CITY – Dakop ang manugbaligya sang mani kag ang menor de edad sa buy bust operation nga ginpatigayon sang Arevalo Drug Enforcement Unit sa isa ka resort sa Brgy. Sto Niño Norte, Arevalo, Iloilo City.
Sa interview sang Bombo Radyo kay Police Staff Sergeant Leonard Aquiatan, ang nagpamuno sa ginpatigayon nga buy bust operation, iya ginpahayag nga ang subject sang buy bust operation amo si Andy Garcia, 18, sang Brgy. Tabuc Suba sa distrito sang Jaro kag manugbaligya sang mani samtang ang menor de edad naman ang ginkilala nga si alyas Roel sang Quintin Salas sa distrito sang Jaro kag isa ka estudyante.
Si Garcia ang nabaklan sang isa ka sachet sang suspected shabu balor P600 kag nakuhaan pa gid sang dugang nga apat ka sachet sang suspected shabu.
Si Garcia ang preso sa Arevalo Police Station samtang pagadal-on naman sa Balay Dalayunan sa Bo. Obrero sa distrito sang Lapuz ang nadakpan nga menor de edad.
