Madamo sang sintomas agud nga mahibaluan kun ang isa ka tawo ang bitukon.
Ini ang kaangot sang ginahiwat sang Department of Health (DOH) nga National Deworming Campaign.
Target sang kampanya sang DOH nga mapurga ang 19 ka milyon nga school-aged children kag 23 ka milyon nga pre-school kag school-aged children nga out of school youth.
Sa interview sang Bombo Radyo kay Dr. Elvin Tiangha, iya ginpahayag nga ang pagpurga ukon deworming amo ang pagkuha sang mga bitok sa intestine sang isa ka tawo pinaagi sa pag-inom sang bulong.
Suno kay Tiangha, ang mga bitok ang nagakuha sang nutrisyon sang tawo.
Ang bitok amo ang ginatunaan sang pagpalanakit sang tiyan kag masami nga pagsuka nga magaresulta sa malnutrition.
Lakip man sa sintomas suno kay Tiangha kun ang isa ka tawo bitokon, amo ang pagkatol ukon pagsakit sa palibot sang alatrasan, manubo nga intelligence quotient (IQ), anemia kag gilayon nga pagniwang ukon pagtambok.
Agud malikawan ang pag-angkon sang parasite sa tiyan ukon bitok, naghatag sang pila ka panugyan ang doktor.
Lakip diri amo ang:
- Paghugas sang kamot bag-o kag pagkatapos magkaon kag maggamit sang banyo.
- Pagsigurado nga matinlo ang ginakaon nga pagkaon.
- Masami nga pagsuksok sang sapatos ukon tsinelas.
- Mangin matinlo sa sulod ukon sa sagwa man sang balay.
