ILOILO CITY (07:31 pm) – Ginkumpirma sang opisyal sang Barangay Malipayon, Iloilo City Proper nga drug surrenderer ang biktima nga ginluthang sang ginapahayag motorcycle-riding suspects sa Barangay Tabucan, Mandurriao, Iloilo City.
Nagahamyangon tubtob subong sa crime scene ang biktima nga ginkilala nga si Agustine Odicta, 52, residente sang Barangay Malipayon kag nagabaligya sang prutas sa Barangay Tabucan.
Sa interview sang Bombo Radyo kay Barangay Kagawad Roland Padigos, iya ginpahayag nga graduating na sa ginapatigayon nga drug rehabilitation program ang biktima kag wala na sang iligal nga aktibidad.
Ginapahayag man nga himata sang Western Visayas’ top drug lord nga si the late Melvin Odicta ang biktima apang sa impormasyon ni Barangay Kagawad Padigos, drug user kag indi drug pusher ang biktima antes ini nagsungka paagi sa Oplan Tokhang.
Suno naman sa residente nga si alias Denden, lima ka bala ang nakit-an sa crime scene kag lima man ka mga lupok ang nabatian sang natabo ang insidente.
Mabuot man nga tawo si Agustine suno kay Denden kag wala man sang natuga nga gamo sa ila nga barangay antes ang natabo subong nga gab-i.
Nagapadayon pa ang imbestigasyon sang mga pulis. I-check pa ang recordings sang closed-circuit television (CCTV) nga iya sang barangay.
This is a developing story. Bantayi ang dugang nga mga detalye sa Bombo Radyo Iloilo.
